Charte de l'emploi local corse : une vraie priorité pour le STC
(A redazzioni d'Alta Frequenza) - A Cartula di l’Impiegu Lucali, purtata da u presidenti di l’Assemblea di Corsica, Ghjuvan Guidu Talamoni, hè stata signata a simana passata da i Camari di Cummerciu è i Camari di i Mistieri di i dui dipartimenti, a Camara Regiunali d’Agricultura è altri participanti. Ssa cartula t’hà com’è scopu di batta à prò di i talenti è di a manu d’opara lucali in u publicu è in u privatu, eppo di metta in ballu misuri di furmazioni di i ghjovani. Una cartula chì ùn hè micca stata signata da u MEDEF è a CGPME, ma dinò a CGT, mentri chì u Prifettu di Corsica, Bernard Schmeltz, in una lettara mandata calchì ghjornu fà à i signatarii, hà incalcatu nant’à u fattu chì tutti i misuri chì pudariani favurizà una parti di a pupulazioni di pettu à un’antra, frà altru in u duminiu linguisticu, era un’infrazzioni chì pudaria inghjinnà seguiti ghjudiziari civili è penali. Ind'è i dui sindicati chì ani signatu ssa cartula di l'impiegu lucali, a CFDT Corsica è u STC, c'era a suddisfazioni. Pà u STC, a cursisazioni di l'impieghi, raghjoni d'essa di u sindicatu, hè missa in avanti da ssa cartula chì devi essa vista com'è un principiu. Soprattuttu ch'elli mancani a CGPME è u MEDEF, un affari chì ùn surprendi micca u STC ma chì u dilludi.
Steti à senta à Jean Brignole pà u STC.
