Centre des déchets de Monte : passe d'armes entre Xavier Lacombe et la majorité territoriale à l'Assemblée de Corse
Hè à veru pisivu, u cartulari di i rumenzuli. Ghjovi à l’assemblea di Corsica, l’analisi di u contu amministrativu di a Cullittività di Corsica pà u 2022 hè stata bedda criticata da l’uppusizioni, è hè sbuccata à nantu à un chjama è rispondi à u sughjettu llu centru di trattamentu di i rumenzuli à vena, in Monte.
Si hè turratu à parlà ni parchì, à senta ni à Corse-Matin, u statu hà crisciutu a so parti di finanzamentu da 40 à 80 %, da ch’idda attivarisca a so missa in anda.
Xavier Lacombe, à nomu di un Soffiu Novu, hà dittu ch’issa dicisioni era unu schiaffu pà l’eletti corsi. Hà fattu ancu rimarcà ch’idd’ùn ci n’era ligna bughjitaria pà i rumenzuli, pà u 2023.
U merri di i Peri hà ancu lintatu un « cocorico autonomie » beddu schirzosu in u so intarventu, da metta in risaltu a incapacità di a maiurità tarrituriali à gistì i cumpitenzi ch’idda t’hà dighjà.
Steti lu à senta.
Louis Pozzo di Borgo hà rispostu, à nomu lla maiurità tarrituriali.
U prisidenti di a CAB hà dittu chì par avali, a Cullittività ùn pudia dà un sceccu in biancu pà un prughjettu chì purtaria à 520€ u prezzu lla tonna di scarti trattata à nantu à issu situ, cù una crescita di 22 % privista ugni annu. In tantu di veda affaccà un mudellu ecunomicu rivistu è currettu, a CdC ùn si voli ingagià ufficialmenti pà issu finanzamentu.
Steti à senta à Louis Pozzo di Borgo.
Da risponda li, Xavier Lacombe hà dittu ch’iddu si trattaia chivi d’un fiascu cullittivu, postu chì u statu hà presu pussessu d’issu cartulari.
Hà ancu dittu chì à issu liveddu, « semu zucchi »
Steti à senta à Xavier Lacombe.
