Cazeneuve - Corsica Libera : les discussions continuent
(A redazzioni d'Alta Frequenza) - Sò infini u FLNC è Corsica Libera chì avarani fattu l'attualità oghji (luni) in Corsica, à l'uccasioni di a visita di u ministru di l'Internu. Aldilà di u ghjiru abituali, di tutti i servizi di u Statu, rilativu à a securità è par asempiu à quilla cuncirnendu i fochi, ùn si pò micca dì chì a ghjunta di Bernard Cazeneuve inde l'isula lacarà tracci pà l'eternu in a Storia di a Corsica. Quissa quì, è i ghjurnalisti chì ci campani, cercani sempri è sò propiu in brama d'infurmazioni annant'à l'avvena di st'isula tuttu simpliciamenti. È si pò dì chì ci sò in ssu mumentu cosi impurtanti pà l'isula : legi NOTRe, cullittività unica, alizzioni tarrituriali chì venini, ùn si saria micca cridutu pussibuli chì a ghjunta inde l'isula di u sicondu parsunaghju di u Statu sighi solu cunsacrata à una visita simplica. Hè dunqua u FLNC chì avarà supranatu una cumunicazioni troppu ammaistrata da i servizi di u ministeru di l'Internu. In fatti, stanotti, l'urganisazioni clandestina hà ramintatu in un cumunicatu, chì a scelta fatta annu di suspenda a viulenza clandestina ùn era micca rimissa in causa. Eppuru, u FLNC aspetta sempri a presa "in contu di i rivindicazioni lighjittimi di u populu corsu, vutati eppuru di manera demucratica da l'assemblea tarrituriali". Corsica Libera hà scuntratu à meziornu Bernard Cazeneuve in privatu. À u cuntrariu di Femu a Corsica, chì ùn hà micca rispostu à l'invitu, u gruppu hà pussutu dunqua amintà cù u ministru di l'Internu tutti i punti annant'à a situazioni di l'isula. Jean Guy Talamoni ùn ci hà micca datu tuttu u spiritu di l'intrattenu, ma ci hà datu quantunqua u so sintimu.
Steti à senta à Jean Guy Talamoni, presidenti di u gruppu Corsica Libera à l'Assemblea di Corsica.
Sur le même sujet
