CAB : une modification du budget adoptée dans la douleur
(A redazzioni d'Alta Frequenza) - Daretu un'unanimità guasgi sana si poni piattà ustilità veri, o dubbiti prufondi in tutti i casi. Hè l'insignamentu chì si pò ritena dopu à u cunsighju cumunitariu di a Cumunità d'Agglumerazioni di Bastia ssu marti. In fatti, s'è annant'à tutti i sughjetti, l'uppusizioni hè stata a sola à un participà micca à i voti, mentri chì i cunsighjeri chì firmavani ani vutatu di manera favurevuli, ferma chì u presidenti di a CAB, François Tatti, hà pussutu senta u ventu di a missa in minurità, bè riali dipoi calchì mesi, frisgiulalli a faccia. In fatti, è soprattuttu annant'à u cartulari di a mudificazioni di u bughjettu 2015 mittendu à cuntribuzioni à 500 000 auri i cinqui cumuni pà culmà ricetti menu impurtanti cà privistu è spesi micca privisti com'è quilla di u rinnovu di u tarrenu sinteticu di u Stadiu d'Erbaghjolu, i raprisintanti di i cumuni è di l'uppusizioni ùn si sò micca fatti prigà pà fà falà cutrati annant'à François Tatti, cù una certa ritinuta o micca. Una cuntribuzioni ghjudicata indispinsevuli par asempiu d'appressu à Jo Massoni, aghjuntu à u merri di Bastia è ciarbellu finanziariu di a municipalità. Ma infini, l'essenziali hè statu assicuratu, ed hè ciò ch'ellu riteni François Tatti, chì ùn manca micca malgradu tuttu di fà calchì fiacchina, par asempiu annant'à u fattu chì quissu quì si senti propiu solu pà gistiscia i finanzi di a CAB.
Steti à senta à François Tatti.
Sur le même sujet
