CAB : les maires et vice-présidents répondent à François Tatti
(A redazzioni d'Alta Frequenza) - Dopu una San Silvestru cù muvimenti, François Tatti ùn duvaria micca sparta u biscottu di i rè cù i cinqui merri di i cumuni di a Cumunità d'Agglumerazioni di Bastia è i trè altri vici presidenti di a maghjurità di quali hà cacciatu i puteri u 31 di dicembri. In fatti, quissi quì ani rispostu in un cumunicatu à u presidenti di a CAB. Una dicisioni imparata ind'a stampa sicondu ssu cumunicatu chì dinunzia chì "malgradu tutti i sforzi di a maghjurità cumunitaria, è cù cunsiquenzi annant'à l'ingaghjamenti presi davanti à ella à u lindumani di a crisa bughjettaria d'aprili di u 2015, François Tatti ùn hà fattu nulla pà vultà à un funziunamentu più cullegiali è più equilibratu, è i prublemi ani cuntinuatu è sò ancu impeghjuriti". L'eletti ghjudicheghjani chì "François Tatti voli cuncintrà tutti i puteri, prerugativi è cumpitenzi di a Cumunità d'Agglumerazioni di Bastia ind'i so mani è quilli di i dui altri eletti chì appartenini à u so gruppu." Infini, i merri è i vici presidenti chì ani persu i so puteri in a CAB stimani chì "a dicisioni unilaterali presa da François Tatti ci caccialli i so dilegazioni à i so vici presidenti, u metti in situazioni, o d'assuma solu a guvernenza di a CAB à u risicu di bluccà tutta l'istituzioni chì devi essa prima di tuttu à u serviziu di i cumuni membri è di i so pupulazioni, o di tena contu di u fattu demucraticu è maghjuritariu ritirendusi da a presidenza".
Sur le même sujet
