Budget primitif CTC 2017 : la mise au point de Gilles Simeoni
(A redazzioni d'Alta Frequenza) - A Cullittività tarrituriali di Corsica hà aduttatu arisera (ghjovi) u so bughjettu primitivu, u prima veru bughjettu primitivu di a mandatura nova è dinò l'ultimu, postu chì un antru annu, l'eserciziu bughjettariu intarissarà a Cullittività di Corsica. Hè d’1,23 millardu d’auri, cù più di 533 millioni pà l’investimenti è più di 692 millioni pà u funziunamentu. Un dibattitu bughjettariu difficiuli duranti una bella parti di a ghjurnata è di a sirata, cù frà altru una discussioni nant’à u debbitu ; un debbitu hà pricisatu Gilles Simeoni attribuitu solu pà una parti chjuca à a so maghjurità, 51 millioni nant’à 609, u restu sò debbiti di l’anziani mandaturi. Ultimu bughjettu, parchì s'hè risintutu duranti i dibattiti arimani (ghjovi) : si trattava di rifletta bè à u statu finaziariu di i trè cullittività è micca d'una sola oramai. A pusizioni d'attesa è d'usservazioni custatata annu pà u bughjettu primitivu 2016 ùn era più di circustanza ssu ghjovi. In fatti, a diritta è a manca, pà raghjoni propiu sfarenti, si sò upposti cù putenza à l'uzzioni bughjettarii difesi da u presidenti Simeoni. Camille de Rocca Serra l'hà ripituta arimani : u fattu chì u gruppu liberali ùn avissi vutatu nè à prò, nè contru in u 2016 appruntava di sicuru un votu negativu pà quist'annu. Hè dunqua cù un ditu accusatori, ghjiratu ver di a diritta è ver di a manca, è cù u verbiu altu, chì Gilles Simeoni hà difesu l'uzzioni di a so maghjurità. A situazioni difficiuli à u nivellu finanziariu di a CTC ùn hè micca liatu à l'azardu è à l'accelerazioni d'una gattiva gistioni. À u cuntrariu, eccu ciò ch'ellu hà vulsutu dì Gilles Simeoni.
Eccu a so intervista.
