Bilan 2015 : le pôle économique et financier de Bastia croule sous les dossiers
(A redazzioni d'Alta Frequenza) - Avvezzu di l’usu di i citazioni micca banali, u prucuratori di a Republica di Bastia, hà discrittu i so servizi com’è « under pressure », fendu rifarenza à u povaru David Bowie, pà fà un bilanciu di l’annata 2015 duranti l’audienza di riintrata 2016 di u tribunali di Grandi Istanza di Bastia. Quissu quì, dopu avè incalcatu annant’à a situazioni bullenti di un ministeru publicu vicinu à a rumpitura à u nivellu naziunali, Bastia fendu figura d’eccezzioni d’appressu à ellu postu ch’ellu ùn manca micca di magistrati, n’hè ghjuntu à u bilanciu stessu. Un bilanciu pusitivu, à u nivellu di a delinquenza, sempri assai cuntinuta in u dipartimentu malgradu u fenomenu di vitturi brusgiati, d’umicidii, cù un bilanciu storicamenti bassu di dui umicidii è una prova cù dui risuluzioni annant’à trè casi, è d’attentati, quì dinò cù un sciffru storicamenti bassu di quattru attentati è una prova, a fini di l’azzioni di u FLNC dicisa duranti l’istati di u 2014 essendu di sicuru liata à ssu sciffru. U polu ecunomicu è finanziariu s’hè vistu incaricatu di vintottu cartulari novi, pà ghjunghja fin’è sittanta cartulari in traccia d’essa struiti. Un sciffru assai o ancu troppu impurtanti pà un polu vittima di u so successu sicondu u prucuratori, andendu da l’affari emblematichi, com’è quilla ditta di i « gîtes ruraux » par asempiu è chì tratta un numaru impurtanti d’affari mischjendu parsunalità pulitichi.
Steti à senta à Nicolas Bessone.
Sur le même sujet
