Bastia : la première pierre des projets Aldilonda et Mantinum a été posée
(A ridazzioni d'Alta Frequenza) - Pierre Savelli, u merri di Bastia, hà postu a prima petra lli prughjetti Aldilonda è Mantinum. Incù iddu c’erani Gilles Simeoni, anzianu merri di Bastia è prisidenti di l’esecutivu di Corsica, u prifettu llu Cismonti Gérard Gavory, ma dinò i riprisintenti llu cabinettu d’architetti Buzzo-Spinelli. U primu prughjettu, chì hè u più imblimaticu, t’avarà una verga suspesa à a citadella è un passaghju à tunellu pà una parti llu parcursu, chì liarà, cù a via calma, u portu di Toga à l’Arinella. Issu prughjettu ambiziunutu d’ottu milliona d’auri, è chì duvaria affaccà pà u 2020, hè statu fattu assucendu u cabinettu Buzzo-Spinelli à u famosu cabinettu di l’alimanu Dietmar Feichtinger, quiddu chì hà fattu u molu llu monti San’Micheli, in francia. In u sicondu prughjettu, ci sarà un ascinsori chì cuddarà da u Vechju Portu à a Citadella, ma supr’à tuttu un tiatru di virdura da suttu à u museu di Bastia. U prughjettu hè purtatu ancu iddu da u cabinettu Buzzo-Spinelli, hà da custà 2,9 milliona d’auri, è sarà rimissu colpu à colpu trà quist’annu è un altru annu. Innanzi di senta a suddisfazzioni lli rispunsevuli pulitichi in i prossimi intarvisti, Jean-Philippe Spinelli ci spieca a sfida di a cuncipitura d’issi prughjetti, è spicialmenti quiddu di l’Aldilonda.
Stemu lu à senta
