Bastia : la caserne des pompiers délocalisée à Furiani pour neuf mois de travaux
Da quì à calchì ghjornu, a caserna di i spinghjifoca di Bastia, posta à nantu à u fronti di mari, hà da essa chjusa par novi mesa di travadda.
Issa caserna duvintata malsana, à senta ni à Hyacinthe Vanni, u prisidenti llu SIS llu Cismonti, hà da essa rinuvata da middurà i cundizioni di vita è di travaddu di i spinghjifoca.
Issi travadda, attaccati in una annata ind’iddi sarani fatti caserni novi in Galeria è a Porta, ani da custà un milionu è trè, ma sò pruvisorii : l’ughjittivu, à più longu andà, hè di custruì una caserna nova, chì a rinuvera ùn hà da bastà à fà chì a caserna vechja sichi adatta à i bisogni novi di l’agglumirazioni bastiaccia.
Steti à senta à Hyacinthe Vanni, u prisidenti llu SIS llu Cismonti.
À chì dici chjuditura pruvisoria dici caserna pruvisoria. Quissa chivi hà da essa in Furiani, in i lucala ch’idda hà da metta à dispusizioni - è di rigalu – a cumunità d’agglumirazioni di Bastia, è chì sò stati quiddi di u centru di furmazioni di u Sporting. I spinghjifoca si ani da pudè ancu ghjuvà di u staziunamentu di a gara di Furiani.
Cambià una caserna di locu hè sfida lugistica di quiddi, masimu s’idda si faci a nova lucalisazioni in l’agglumirazioni bastiaccia.
Parichji provi sò stati fatti, è ancu à l’ora ind’idda hè imbricata a strada tarrituriali, u tempu in più par ghjunghja in cori à Bastia sarà pocu.
Ma quantunca, hè privista di fà un postu avanzatu ind’idda hè a caserna attuali o ancu in gara di Bastia, da pudè riceva una squadra o ancu matiriala, sicondu i bisogna.
Steti à senta u culineddu Clément Préault, dirittori aghjuntu di u SIS llu Cismonti.
I lucala aprudati ani da ghjuvà ancu dopu à u passaghju pruvisoriu di i spinghjifoca. A CAB vurria fà di l’anzianu centru di furmazioni di u SC Bastia un centru pà ghjovani travaddadori, cù 23 picculi alloghja.
Steti à senta à Louis Pozzo di Borgo, u prisidenti di a CAB.
Sur le même sujet
