Audience de la rixe de Siscu : un pas vers l'apaisement selon Jean-Guy Talamoni
(A redazzioni d'Alta Frequenza) - Ssu ghjovi, i cinqui parsoni chì erani in guardia custodia ssu marcuri passavani subbitu davanti u tribunali di Bastia in u quadru di l'affari di Siscu. U rinviu di l'audienza hè statu dumandatu è uttenutu da l'avucati di i trè membri di a famighja Benhaddou, maestri Anaïs Colombani è Jean Pierre Rigaut Pasqualini. Malgradu tuttu, aspittendu l'audienza di u 15 di sittembri, Mustafa Benhaddou, elementu mutori di a baruffa sicondu u prucuratori di a Republica di Bastia Nicolas Bessone, firmarà in prighjoni di manera pruvisoria, cù u so passatu ghjudiziariu carcu chì hà avutu un'impurtanza maiò pà pighjà ssa dicisioni, com'è a scappata di un quattriesimu membru di a famighja Benhaddou impignatu inde l'incidenti, Hocine, chì era dighjà in situazioni micca rigulari nant'à u tarritoriu francesi sempri sicondu u prucuratori. Pà contu soiu, Jamal è Abdelilah Benhaddou sò sottu à cuntrollu ghjudiziariu cù interdizzioni d'andà in Siscu è di pighjà cuntattu cù l'altri prutagunisti di l'affari, mentri chì i dui Sischesi, Lucien Straboni è Pierre Baldi, sò sottu à cuntrollu ghjudiziariu cù interdizzioni d'entra in cuntattu cù l'altri prutagunisti. A riazzioni di i parsunalità pulitichi era assai aspittata, soprattuttu chì Gilles Simeoni è Ghjuvan Guidu Talamoni aviani cuntribuitu à a pussibilità pà i dui Sischesi di vultà in casa soia pà passà a nuttata ssu marcuri mentri a so guardia custodia. Pà Ghjuvan Guidu Talamoni, c'era una certa cuntintezza dopu à ss'audienza, cù u sintimu chì un passu ver di l'appaciata hè statu francatu.
Steti à senta à Ghjuvan Guidu Talamoni.
Sur le même sujet
