Attentats de Paris : rassemblement dimanche à Bastia
(A redazzioni d'Alta Frequenza) - Quarantottu ori dopu à l’attentati chì ani toccu à Parighji, è mentri chì un dolu naziunali di trè ghjorni hè statu dicisu, un’adunita abbastanza singulari hè stata urganizata in Bastia ssa dumenica dopu meziornu. Singulari parchì ùn si trattava micca di renda umaghju à i vittimi, ma d’alzassi contr’à « l’islamisazioni di a Corsica » sicondu u muvimentu Vigilenza Naziunale Corsa chì avia lampatu ssa chjama. Più di una centina di parsoni pà sprima a collera, è una misfidanza putenti ver di i migranti è l’islam in generali. VNC hà dinunziatu in fatti, à mezu ad altri cosi, a radicalisazioni chì tuccaria, sicondu u muvimentu, a Corsica è u fattu chì immigrati sariani privileghjati di pettu à i corsi in u quadru di l’attribuzioni di l’alloghji suciali. Certi parsoni sò ghjunti pà cuntistà u missaghju purtatu da VNC, inghjennendu liti verbali trà membri di l’adunita è parsoni upposti à u missaghju purtatu da quissa quì. Ind’è i parsoni ghjunti contr’à u missaghju purtatu, c’era l’incumprensioni pà ciò chì tocca a cunfusioni fatta trà l’islamisimu è i musulmani è soprattuttu si stimava chì l’ora era à u dolu è micca à ssu gennaru di missa in uppusizioni.
