Le Direct

Assassinat de Patrick Sorba : l'enquête démarre

(A redazzioni d'Alta Frequenza) - L'inchiesta principia dopu à u novu umicidiu accadutu stamani (marcuri) ind'u golfu di u Valincu. Rammintemi chì Patrick Sorba, 44 anni, hè statu tombu versu 9 ori è 30, mentri ch'ellu era ind'una stazioni serviziu, à l'intrata di Prupià. Sicondu i servizii di u ministeru publicu di Corsica Suttana, dui armi sariani stati utilizati. A vittima hè stata tocca da un fucili di caccia è da una kalachnikov. L'autopsia, chì sarà rializata dumani in Aiacciu, duvaria parmetta di cunfirmà issi primi custatazioni. Da nutà chì u prucuratori di a Republica, hà ammintatu dinò un veiculu ritrovu brusgiatu vicinu à i lochi di i fatti. L'inchiestadori provani à sapè di modu sicuru s'ella hè veramenti issa vittura chì u o i tiradori ani utilizatu. Pà ciò chì tocca à a vittima, u ministeru publicu pricisava ch'ella era cunnisciuta da i servizii di pulizza, ch'ella era dighjà stata cundannata tempi fà, è ch'ella purtava oramai un braccialettu elettronicu. Nisun ipotesi hè schisata malgradu tuttu, dopu à issu novu assassiniu, dighà u 16u dipoi u principiu di l'annu in Corsica.