Assassinat d'Yvan Colonna : Femu a Corsica réagit à la lettre de Franck Elong Abé
Dopu ch’idda sichi stata palisata a scrittura d’una lettara di franck elong abé, chì ripidda i circustanzi di u so attaccu murtali contru à Yvan Colonna mintuvendu a intarvinzioni d’un cumanditariu frusteri à a prighjoni, hà riagitu Femu a Corsica.
U partitu dici chì « tutti l’ipotesi nicissitighjani una inchiesta seria è imparziali.
A pussibilità d’una primiditazioni, o ancu d’una cumanda di l’assassiniu d’Yvan Colonna ùn pudiani essa sclusi capu innanzi, masimu tinindu contu di u cuntestu udiosu chì pisaia à nantu à i parsoni imprighjunati in u quadru di l’assassiniu di u prifettu claude érignac.
Parichji punti scuri è disfunziunamenti sò stati missi in risaltu da a spizzioni ginirali lla ghjustizia è da a cumissioni d’inchiesta parlamintaria, è ani datu forza à issu custatu.
Vurriami ramintà chì ad oghji, l’ipotesi d’un criminu tarruristu islamicu, mutivatu da una ghjastima, è difesa di manera sclusiva in a prima cumunicazioni di a Pracura Naziunali Anti Tarrurista, s’arrimbaia unicamenti à i dichjarazioni di franck elong abé.
Iss’ipotesi hè stata bedda rilativizata da parichji attori, mentri l’audizioni di a cumissioni d’inchiesta.
I corsi in ginirali, è i naziunalisti particulamenti, cunnoscini bè i pessimi stratigii in suttu, quiddi missi in anda longu à u cunflittu d’issi tanti anni trà a Corsica è u statu francesu.
