Assassiniu d’Alain Orsoni : a riazzioni di Gilles Simeoni
Gilles Simeoni, u prisidenti di l’esecutivu lla Corsica, hà riagitu marti à l’assassiniu d’Alain Orsoni, successu luni in Veru, mentri u intarru lla so mamma.
Dici Gilles Simeoni ch’iddu hè statu, Alain Orsoni, una parsona di prima trinca di a storia cuntimpurania di u naziunalismu corsu, cù a so parti di lumu è a so parti d’umbra.
Pà u prisidenti di l’esecutivu, issu novu assassiniu si scrivi in a pessima filara di drami è umicidii chì addolani i famiddi è i lacani afflitti.
Veni in u filu d’una prissioni maffiusina chì si faci più chè greva in a sucità corsa.
I circustanzi llu fattu venini à nutrì l’emuzioni, u pinseri è u stumacheghju ch’iddi risentini i corsi : l’assassini, chì si movini à l’appiattu, disprezzani a vita, ma ancu ciò chì faci a noscia cultura, u nosciu raportu à a morti, à a famidda, à a sucità.
Cù iss’ambienti beddu pessimu, chì minaccia u funziunamentu llu pattu suciali, ora hè d’impignà si à prò di a dimucrazia, è di metta à u scartu i pratichi maffiusini.
Pà issu particulari, tocca à u statu, rispittendu u statu di drittu, di fà viaghjà à veru i so cumpitenzi rigaliani.
Par contu soiu, i stituzioni lla Corsica ani da cuntinuvà à fà a dimustrazioni chì u populu corsu voli una sucità appaciata, libara è dimucratica. È ch’iddu si hè mubilizatu par custruì la ».
Sur le même sujet
