Arrêtés Miot : la réponse de Paul Giacobbi
(A redazzioni d'Alta Frequenza) - Nanzi à u dibattitu rilativu à u serviziu maritimu di a Corsica dumani (vennari) è nant'à a DSP à vena, l'Assemblea di Corsica cuminciava oghji i so travaghji cù i tradiziunali quistioni urali à l'Esecutivu. L'avenimenti essendu accaduti dopu à u scontru SCB - PSG dumenica ani pruduttu dui quistioni. Certi raprisintanti di Femu A Corsica è u gruppu Corsica Libera vuliani una pusizioni chjara di l'Assemblea di pettu à issi baruffi. Paulu Giacobbi, hà annunziatu ch'ellu pighjarà cuntattu cù u prifettu di Corsica Suprana è u Ministru di l'Internu pà sapè ciò chì s'hè passatu veradimenti à a surtita di u stadiu. U presidenti di l'Esecutivu voli malgradu tuttu chì issu gennaru d'affari ùn accadessini più è chì i prossimi scontri, spurtivi frà altru, si passessini bè. Aldilà di què, Gilles Simeoni, pà Femu A Corsica hà postu torna una volta u prublema di l'Arrestu Miot, è di a so prulungazioni. L'elettu naziunalistu hà rammintatu a voghja guasgi sana di difesa di issa specificità fiscali in materia di dirittu di successioni. Una riflessioni, chì s'hè integrata dopu ind'una dimarchja più glubali di purtata custituziunali, via a cummissioni Chaubon. Gilles Simeoni hà stimatu chì s'è l'Assemblea avia avanzatu ind'i so travaghji, duvia appruntà si pà dui mumenti ditarminanti "punti significativi di a credibilità di a nostra istituzioni". Una risposta in leia cù a dumanda pà Paulu Giacobbi, chì hà ghjudicatu chì ùn si pudia "accittà" u fattu chì u guvernu ùn avissi ancu trasmissu l'avisu di u Cunsighju di Statu ghjudichendu micca custituziunali qualsiasi trasferimentu di cumpetenza fiscali. Un'incustituziunalità chì parmittarà di purtà un antru gennaru di dibattitu.
Écoutez Paul Giacobbi.
Sur le même sujet
