Annonce de Jean-Michel Baylet : pas de confusion !
(A redazzioni d'Alta Frequenza) - U ministru di l'accunciamentu di u tarritoriu Jean Michel Baylet hà annunziatu ssu marti l'attribuzioni di un aiutu di 104 millioni d'auri à a Cullittività Tarrituriali di Corsica. Jean Michel Baylet hà infurmatu ssu marti u presidenti Gilles Simeoni di ss'aiutu datu pà l'arrigulamentu di l'imprestiti tossichi di l'anziani mandaturi. Si pò leghja in u cumunicatu di u ministru chì "ssa dicisioni faci seguita à una dumanda di a CTC di u mesi d'aprili scorsu chì vulia benefizià di u fondu criatu da u Statu in sustegnu à i cullittività chì ani sottuscrittu imprestiti strutturati. Ssu fondu, di 3 milliardi d'auri, hè uparaziunali dipoi sittembri di u 2015 à prò di i cullittività chì volini escia da i so imprestiti à risichi". Di pettu à u marosulu mediaticu accadutu duranti u votu di u bughjettu primitivu 2016, hè impurtanti di pricisà bè i cosi. In fatti, ss'aiutu di 104 millioni sarà percepitu cusì : 8 millioni d'auri duranti 13 anni è sarà solu pà u rimbursamentu di l'imprestiti tossichi. Ùn hà nulla à chì veda dunqua cù u bughjettu 2016 è i più di 100 millioni di debbiti di a mandatura scorsa. Hè u missaghju assai chjaru ch'ellu hà vulsutu fà passà u presidenti di l'Esecutivu di Corsica.
Steti à senta à Gilles Simeoni.
