Alliance Simeoni-Tatti-Milani à Bastia: les explications du candidat divers gauche
(A redazzioni d'Alta Frequenza) - In Bastia, senza chì nimu risintessi calcosa, si pò dì chì a tarra hà trimatu. In fatti, à u sicondu ghjiru di l'alizzioni municipali di dumenica chì veni, Jean Zuccarelli, leader di un'unioni PRG-PC, a listessa cà duranti u primu ghjiru, sarà solu contr'à Gilles Simeoni, chì hè oramai di manera ufficiali u numaru unu di una lista d'unioni cù François Tatti, Emmanuelle de Gentili è Jean Louis Milani. In fatti, hè un veru fronti contr'à Zuccarelli chì si custituisci dopu à un luni di neguziazioni chì ani inghjinnatu ss'unioni di i forzi naziunalisti muderati, di i forzi di manca è di una parti larga di a diritta bastiaccia. Un veru melting pot puliticu cù cuncissioni da ogni parti. Si pò rimarcà chì Eric Simoni, u candidatu Corsica Libera, è quilli chì erini annant'à a so lista, sò stati missi da cantu. Calcosa chì duvaria essa difficiuli ad accittà pà a famighja indipendentista, chì dopu à Portivechju hè scantata in Bastia. A partita pari essa oramai assai cumplicata pà Jean Zuccarelli.
Steti à senta u candidatu di manca François Tatti, chì spieca dinò u sensu di u so impegnu è i raghjoni chì l'ani purtatu à rializà st'allienza.
