Alerte à la pollution
(A redazzioni d'Alta Frequenza) - Ind'un cumunicatu, a Prifittura Marittima di u Mediterraniu dici ch'ella ci hè un'alerta à a pulluzioni. Eri dopu meziornu, (vennari), un avviò di trasportu militari alimanu hà chjamatu u CROSS pà fà li sapè chì c'era una pulluzioni marittima. Hè stata usservata à u largu di a costa à livanti di a Corsica, trà Bastia è A Sulinzara. U CROSS hà mubilizatu subbitu un elicotteru di a securità civili pà una ricunniscenza aerea. A Prifittura marittima di u Mediterraniu hà fattu svià in ssu mentri u "Pluton", battellu di i ciuttadori sminadori di a Marina naziunali, pà vistigà a zona supposta pulluata. À a fin di u dopu meziornu, i risultati di i primi ricunniscenzi cunfirmeghjani a prisenza di parechji punti di pulluzioni marittima pà ssi lochi, nant'à un assu nordu livanti / meziornu punenti. Una previsioni di deriva di ssa pulluzioni hè stata dumandata à Météo France. U risultatu hà cunfirmatu l'assenza di deriva versu u liturali corsu nant'à un tempu di 24 ori. À partasi d'arisera, i parsunali di u battellu di i ciuttadori sminadori di a Marina naziunali hà fattu un prilevamentu di u pruduttu chì pullueghja è hà principiatu un travaghju dittu di "brassage mécanique" nant'à i punti di pulluzioni usservati. À a fin di ssa matinata di sabbatu, a Prifittura marittima hà dumandatu un novu bulu d'usservazioni aerea cù un elicotteru di a dugana francesi. I risultati di ssu bulu cunfirmeghjani a prisenza di punti di pulluzioni sfarenti spargugliati nant'à un primu pezzu in rettangulu di 500 x 100 metri è nant'à un sicondu in chjerchju di 300 metri di diametru. U primu hè à 3,5 nautichi (6,4 chilometri) à u livanti di u fanali d'Alistru, u sicondu à 4,9 nautichi (9 chilometri) di u listessu fanali. U travaghju di u bastimentu di a Marina naziunali sopralocu cuntinueghja in boni cundizioni oghji. Pà privenzioni, patrugli di a Gendarmeria sò stati urganizati nant'à u liturali corsu.
Sur le même sujet
