Alain Mosconi démissionne de ses fonctions au STC des Marins
Alain Mosconi hà dicisu di dimissiunà di i so funzioni à u STC di i marinari, è di lascià a cumpagnia.
Causa ni sariani i risultata à l’alizzioni di i riprisintanti di u parsunali à u CSE.
« U STC, issendu sempri quantunca a siconda urganisazioni lla cumpagnia, hà fattu u so risultatu u più debuli in quindici anni, parvia di a divisioni. Ùn ni dumandaia po’ tantu a CGT, chì hè duvintata cusì a sola urganisazioni sindicali à pudè zifrà legalmenti accordi d’impresa », rigreta Alain Mosconi.
« Tandu, a vi pudeti pinsà chì u risultatu d’iss’alizzioni pizzica u militanti storicu di u STC è l’indipindintistu ch’e’ socu. Rigretu oghji una spulitisazioni di u salariatu à a Corsica Linea chì cresci è impinsirisci. Hè cusì ch’iddu si hè fattu u scartu ideulogicu trà una maiurità di i impiicati è mè ».
« Di fatti, ùn possu cuntinuvà à tena i me mandati », spieca di manera chjara quiddu chì oramai ùn hè più u capifila di u STC di i marinari.
« In cunsiquenza, ùn issendu mi mai lasciatu accicà da l’oru di i tituli, ùn avendu mai cidutu à u cunfortu di i futtogli, è in accordu cù l’omu ch’e’ socu è ch’e’ so’ sempri statu, mettu fini senza altru à a me funzioni di DS è à quidda d’elettu di u CSE. Par essa logicu in tuttu, è senza ch’e’ achi l’annuità par pratenda à una ritirata cumpletta, aghju dicisu di lascià capunanzi a cumpagnia », pricisa Alain Mosconi.
