Ajaccio : un cas de dengue détecté
(A redazzioni d'Alta Frequenza) - L'Agenza Righjunali di a Saluta hà fattu sapè à a Cità d'Aiacciu ssu marcuri chì in certi lochi aiaccini, hè passatu un coppiu di ritornu di vacanzi, infettatu da a dengue. Di pettu à a prisenza di a zinzala tigra, è à i misuri privisti à u nivellu naziunali pà luttà contr'à u chikungunya è a dengue in Francia metrupulitana, l'ARS hà da lancià una volta chì ci sarà a notti, ssu ghjovi, à partasi da 5 ori di sera, un trattamentu pà tumbà i zinzali prisenti ind'una zona periferica di 100 metri cuprendu l'angulu di u carrughju comte Bacciocchi è di u corsu Nabuliò, carrughju dittu di i Trois Marie fin'è u viali Sampieru. L'intarvinzioni hè rializata da l'ARS, u cunsighju ghjinirali di Corsica Suttana è a Cità d'Aiacciu cù i mezi tennichi di u CG2A. L'uparazioni inghjinnarà accunciamenti di circulazioni limitati ind'u tempu nant'à i vii cuncirnati. Duranti u tempu di l'intarvinzioni, vali à dì 20 minuti à u più, hè racumandatu à a pupulazioni, chì stà ind'i 100 metri di ssa zona quì, di stà si ni casa, ind'i cumerci, scagni... Ss'uparazioni, appena scarsa, ùn hè micca eccezziunali malgradu tuttu, una quindecina di trattamenti di u listessu gennaru essendu fatti tutti l'anni nant'à u tarritoriu di a cumuna, pà limità a pupulazioni di zinzali.
Sur le même sujet
