Ajaccio : nouvelle prolongation de l'alerte aux particules fines
(A redazzioni d'Alta Frequenza) - Di pettu à l'indicazioni trasmessi da Qualitair Corse è à i previsioni d'evuluzioni di u nivulu di particuli d'urighjini africana annant'à i lochi d'Aiacciu, l'arrestu prifitturali cù i so misuri di riduzzioni di l'emissioni di particuli liati à l'attività umana inde l'aria hè prulungatu torna fin'è stasera (marti) à 9 ori. In fatti, u mumentu forti di cuncintrazioni custatatu arimani in fin di dopu meziornu (120µg/m3) è l'assenza d'acqua ùn parmettini micca di pinsà à una migliurazioni di a situazioni da quì à calchì ora. I nivelli di cuncintrazioni di particuli fini privisti duvariani firmà superiori à 100µg/m3. Ssu fenomenu, d'urighjini naturali soprattuttu, ùn devi micca crescia par via di l'attività umani. Pà ssi raghjoni, i misuri chì toccani, pà settori, a vita cullittiva, chì sò amintati inde l'arrestu prifitturali chì hè statu diffusatu prima fermani d'attualità.
