Ajaccio: de grands travaux pour tenter de fluidifier la circulation
(A redazzioni d'Alta Frequenza) - Hè meghju un bellu disegnu cà un gran discorsu, dicia Nabuliò ed vali ancu di più pà ciò chì tocca i travaghji chì sò rializati in ssu mumentu ind'a so cità. Hè difficiuli à a radiu di parlà di cantieri chì dumandariani, pà capiscia bè tuttu, tanti piani è tanti disegni. Travaghji impurtanti sò in corsu nant'à un settori maiò andendu da a gara fin'è a crucivia di i Salini cù par asempiu l'accuciamentu novu di a crucivia di San Ghjuvà Castelvechju. U scopu di l'uparazioni hè di renda più linda a circulazioni inde ssu settori assai cumplicatu soprattuttu da fà chì i traghjetti di l'autobus andessini più in furia. Pà què, u curridori di bus sarà prulungatu fin'è a piazza Abbatucci, un parking sarà custruitu nant'à u tarrapianu di a gara è a crucivia cunfigurata d'un'antra manera. Altri travaghji sò dighjà stati fatti o sarani lanciati da quì à pocu ind'u quartieru di San Ghjuvà, viali Moncey, strada di Biancarellu par asempiu. È ss'affari laca spuntà altri travaghji ancu di più impurtanti chì principiarani un antru annu cù a rialisazioni di trè posti pà l'acquati pà renda più sicuru tuttu ssu settori di a cità di manera difinitiva.
Steti à senta à Jérôme Terrier, direttori ghjinirali di i servizii tennichi di a cità d'Aiacciu.
Sur le même sujet
