Aiacciu in Cantu : J-4 !
(A redazzioni d'Alta Frequenza) - G-4 ! Ghjovi, piazza di u Diamanti in Aiacciu à partasi di 9 ori di sera, artisti numarosi vi farani sparta u so universu riccu è variu pà a sirata Aiacciu in Cantu. Eppo ci ni sarà di tutti i mammi ! A ghjuventù prima, cù a scola l'Entrée des Artistes, chì vi prupunarà di scopra o di scopra torna l'universu di l'annati neri è dittu "des années folles". U cantu dittu tradiziunali è a varietà dopu, cù u ghitaristu di talentu Petru Cerutti, è a dulcissima Midò Muziotti, cù a so furmazioni Abbadà. A pulifunia corsa dinò, cù u gruppu I Campagnoli, chì, cù a so armunia vucali farani crescia l'anima corsa, ma dinò cù u gruppu Surghjenti è più di trè dicennii di carriera, cumpunenti tremenda di u paisaghju musicali corsu cù canzoni novi o ancu più classichi com'è « Ricordu », « A me patria », o ancu « I cumbattanti d’onori », risunarani annant'à a scena. Infini, l'invitatu di ssa sissioni 2015 d'Aiacciu in Cantu vi farà viaghjà da Roma fin'è in California, Davide Esposito, grandi autori è cumpunidori chì s'hè lanciatu dipoi calchì annu in una carriera d'intarpretu, è chì hà isciutu pocu fà un dischettu di ripresi di canzoni califurniani famosi cantati in talianu, com'è u titulu "A Cavallo del Vento". Un cuncertu gratisi, in cori di l'istati, à ùn mancà micca !
Sur le même sujet
