Agriculteurs corses : la colère !
(A redazzioni d'Alta Frequenza) - Zerga putenti di l'agricultori corsi manifistata stamani (luni) davanti i prifitturi di Bastia è d'Aiacciu. S'erani mubilizati pà dinunzià u disimpegnu tutali di u Statu cuncirnendu l'appiecazioni di a Pulitica Agricula Cumuna 2014-2020, chì duvia rimetta à nivellu l'agricultura corsa di pettu à u cuntinenti à parechji piani. In Bastia, l'affari ùn si sò micca passati troppu bè, postu chì i manifistanti si sò upposti à i CRS dopu chì certi avissini saltatu u purtonu di a prifittura. S'è certi ani lampatu petri, l'altri ani ripostu cù i gaz lacrimogeni, mentri chì unu di i manifistanti hè statu arristatu da a pulizza. In Aiacciu, a mubilisazioni s'hè fatta appena di più in u calmu, ancu s'è u sonu di i trattori hà ribumbatu forti annant'à u corsu Nabuliò, induva a circulazioni hè stata bluccata duranti una bella parti di a matinata. Dumandendu à essa ricivuti da u prifettu di Corsica è truvendu u tempu longu, l'agricultori suttanacci ani scuzzulatu appena u purtonu cù un trattori, prima chì una dilegazioni di una quindecina di parsoni intrissi in u Palazzu Lantivy. Agricultori chì si sentini ingannati da u Statu, è soprattuttu da u ministru di l'Agricultura Stéphane Le Foll, chì avia fattu parechji prumessi duranti a so visita in Corsica calchì tempu fà.
Steti à senta à Stéphane Paquet, u presidenti di a Camara d'agricultura di Corsica Suttana.
Sur le même sujet
