Agression d'un jeune homme à Calvi : le PNC communique
Photo d'archives
U PNC hà fattu una cumunicaioni, dopu à l’agrissioni di un ghjuvanottu in Calvi, fertu da setti cultiddati.
« In a notti da marti à marcuri, un ghjovanu calvesu, cumircianti stimatu in a cità, hè statu a vittima d’una prova di micidiu à l’arma bianca.
Hè statu uspitalizatu in urgenza assuluta. U so statu hè stabilizatu avali, è si spera ch’iddu si rimittarà prestu è senza cunsiquenzi.
Passatu u fattu, sò stati vivi i riazzioni in Calvi, parvia di i circustanzi d’issu drama.
L’agrissori prisunti sò stati missi in asaminu è incarciarati, ma i cumenti ci sò sempri, in a stampa o pà issi reti suciali.
Pà u PNC, ci vurria ch’idda ùn durghi, issa situazioni tesa. L’appacera devi piddà a suprana, hè l’intaressu di tutti.
A dimu di manera sullenna : a Corsica ùn devi piddà a via d’una pirifiria, cù maneri ghjunti da i gran’metrupoli, è chì à veru ùn si poni suppurtà.
Parchì issu paesu ùn pò suppurtà senza riagì issa fatalità, è ch’iddu brama ch’idda volti a serenità, avemu sceltu oghji di piddà parolla.
Parlà hè di gran’primura, ancu puri ch’iddu ci sichi un risicu, chì nimu chivi ùn a si sfranca d’un piriculu, è ciò chì hè successu marti in Calvi ùn hè successu cusì à casu.
À quiddi chì dani lighjittimità à tutti i pruvucatori, dimu chì a noscia ghjuvantù ùn hè nè razzista, nè zenoffuba, ma ch’idda ricusa u tempu di i malavii è di u spussessu, di a perdita di i marchi culturali è sucitali, u rinculu cuntinivu di i so marchi d’identità, a sparizioni di i sulidarità è a mancanza di pirspittivi veri, in una sucità fatta preda d’ugni spiculazioni.
Hè datu chivi un dibattitu di fundu, chì u PNC voli purtà pà a prossima sissioni di l’assemblea, à l’ora chì i lutti storichi di u nosciu populu aspettani un cambiamentu veru è un’evuluzioni stituziunali.
In chjudenda, u PNC ni chjama à a serenità è à u rispettu. Manda tuttu u so sustegnu à u ghjovanu calvesu, à a so famidda è à quiddi, beddi numarosi, tocchi da issu drama.
Sur le même sujet
