Le Direct

Affaire Orsoni : Choquet - Thatcher

(A redazzioni d'Alta Frequenza) - "U ghjudici Choquet duvarà pighjà u vistitu di madama Thatcher"! L'infrasata, carca di sensu, hè stata prununziata arisera (luni) da Alanu Orsoni, duranti a riunioni publica cunsacrata à a ghjustizia d'eccezzioni, fatta da a JIRS di Marseghja. Parechji centunai di parsoni, frà i quali numarosi parsunalità pulitichi, s'erani resi à issa riunioni da fà senta u so disaccordu è u so timori di pettu à a multiplicazioni di i grevi di a fami. Dipoi oramai trè settimani, Guy Orsoni, u fighjolu d'Alain, hè in greva di a fami da dumandà l'evuluzioni di u so cartulari. Malgradu l'accanimentu di i so avucati, u so cartulari hè tutalmenti bluccatu è u ghjudici Choquet hà ancu annunziatu chì Guy Orsoni saria non solu trasferitu in Fresnes, ma dinò ch'ellu saria nutritu di forza. Ciò chì ùn pudarà micca essa u casu pà Alanu Orsoni, chì hè libaru è chì pò dunqua rializà a so greva di a fami com'ella li pari, com'è ni tistimunieghja a rifarenza fatta arisera à Margaret Thatcher è à Bobby Sands. A tinsioni si pudia risenta arisera à u Palazzu di i cungressi d'Aiacciu, parchì chì tutti l'intarvinanti ani vulsutu sottulineà u carattaru gravi di a situazioni. U preti Gaston Pietri, chì hà cunnisciutu ind'i tempi soii a corti di sicurezza di u Statu, hà vulsutu fà a so tistimunianza.

Écoutez le père Gaston Pietri