Affaire du Café Riche : la décision mise en délibéré au 12 septembre
(A redazzioni d'Alta Frequenza) - Ssu marti, u Tribunali Currizziunali di Bastia trattava l’affari dittu di u Café Riche. Inde ss’affari, hè rimpruvaratu à Pierre Marie Geronimi, u presidenti attuali di u SC Bastia, club chì ùn hè mancu appena impignatu inde ssu cartulari, d’avè fattu abusi di bè suciali quand’ellu gisitiscia a sucità di lucazioni di vitturi LAC. Abusi di bè suciali di parechji centunai di millai d’auri sottu a forma di scumessi nant’à cavalli pagati cù scecchi di a so sucità à u Café Riche in Bastia, di quali quillu chì n’era à u capu, Charles Filippi, passava par avè piattu ssi fatti. U prucuratori di a Republica di Bastia, Nicolas Bessone, hà dumandatu dui anni di prighjoni attimpati, 50 000 auri d’amenda è un’interdizzioni difinitiva di gistiscia un’intrapresa contr’à Pierre Marie Geronimi, mentri chì un annu di prighjoni attimpatu, 50 000 auri d’amenda è cinqui anni d’interdizzioni di gistiscia un’intrapresa sò stati dumandati contr’à Charles Filippi. S’è l’avucatu di ss’ultimu, maestru Pierre Louis Maurel, hà dumandatu ch’ellu sighi assoltu, l’avucatu di Pierre Marie Geronimi, maestru Jean André Albertini, hà dumandatu l’indulgenza di u tribunali, postu chì u so clienti hà ricunnisciutu i fatti. A dicisioni sarà cunnisciuta u 12 di sittembri.
Steti à senta à maestru Jean André Albertini.
