Affaire Brandao : condamnation et précisions du SC Bastia
(A redazzioni d'Alta Frequenza) - Cartulari Brandao : in un cumunicatu publicatu in principiu di dopu meziornu (luni), u SC Bastia "cundanna senza nisun ambiguità u gestu di u so attaccanti contr'à u ghjucadori Thiago Motta, dopu à a fin di u scontru trà u PSG è Bastia". "U Sporting si riserva a pussibilità di fà azzioni più tardi in ssu cartulari. U nostru club pighja dunqua oghji i so rispunsabilità, cù dignità è in u rispettu di i cumpetenzi di tuttu ognunu", si pò leghja dinò in ssu cumunicatu. "Ùn tocca micca à i dirighjenti, u staff è i ghjucadori di pighjà u rollu di l'istanzi chì sò i soli à pudè prununzià sanzioni spurtivi", cuntinueghja u club bastiacciu. È di cuntinuà : "ch'ellu ci sighi tuttu simpliciamenti parmissu di lagnacci di u cumpurtamentu quant'è impussibuli à accittà di certi ghjucadori chì insultani è pruvucheghjani à più pudè i so avversari, com'elli a dimostrani torna una volta i maghjini di u scontri è tistimunianzi numarosi". "Hè par quissa ch'è no dumandemi à tutti i parti di mustrà ritinuta da fà chì ssu cartulari sighi trattatu di a manera a più ghjusta pussubuli", compii u Sporting Club di Bastia.
