Adoption de l'article 13 de la loi NOTRe : sentiment de Camille de Rocca Serra
(A redazzioni d'Alta Frequenza) - Hè dunqua ufficiali dipoi arimani (marcuri) in fin di dopu meziornu : a Corsica t'avarà bè una cullittività unica in u 2018. In fatti, l'articulu 13 di a legi NOTRe hè statu aduttatu da l'Assemblea Naziunali in siconda littura, senza essa una vera surpresa, parchì tuttu era dighjà statu dicisu dipoi u primu votu di l'Assemblea Naziunali calchì sittimana fà. Prova si n'hè chì u guvernu hà vulsutu andà in furia pà u votu di ssa legi, è par asempiu di u famosu articulu 13 chì ci cuncerna, i 26 amendamenti, prisintati particularmenti da Paul Giacobbi è dinò da Camille de Rocca Serra, sò stati cacciati dopu à una dumanda insistenti di Marylise Lebranchu. Hè dunqua una meza cuntintezza mischjata cù una meza dillusioni chì era prisenti arisera in menti à i trè diputati di a Corsica, chì ani participatu à ssu dibattitu, Sauveur Gandolfi Scheit, ellu, era assenti. Caccià l'amendamenti pà ùn renda micca di più difficiuli u dibattitu parlementariu, hè dunqua a tattica aduttata da u guvernu pà fà passà in furia un articulu chì avaria pussutu pona un prublema. Camille de Rocca Serra, com'è Paul Giacobbi, hà suvitatu a direttiva di u guvernu. Hà vulsutu spiegà quantunqua parchì hà postu amendamenti rilativi par asempiu à a raprisintazioni di i tarritorii, o ancu à u statutu di l'elettu. "Chiche", Camille de Rocca Serra hà ripresu cù a risa a parolla famosa di Bernard Cazeneuve.
Steti à senta à Camille de Rocca Serra.
Sur le même sujet
