Accident de la route en Haute-Corse
(A redazzioni d'Alta Frequenza) - C’hè statu un accidenti arisera (ghjovi) versu setti ori è mezu annant’à a strada naziunali 193, à a surtita di Francardu, par andà in u Ponte à a Leccia. Una vittura hà pichjatu contr’à un’antra chì ghjunghjia in faccia, par raghjoni chì ùn sò ancu cunnisciuti di manera esatta, forsa vulendu trapassà un’antra vittura. Tistimonii prisenti sopralocu ani chjamatu tandu i succorsi. Trè parsoni sò stati feriti gravi, cù à mezu à quissi quì un ghjuvanottu di una vintina d’anni chì cunducia una di i dui vitturi. I vittimi sò stati presi in carica da i succorsi di u Centru di a Corsica, prima d’essa purtati à l’uspidali di Bastia in elicotteru o in ambulanza. Un accidenti chì hà diragnatu duranti un tempu longu a circulazioni annant’à ssu pezzu di strada particularmenti periculosu.
