AC Ajaccio : le Cullettivu Biancu è Rossu se mobilise

In a cuntinuvità di l’ultimu cumunicatu publicatu in i reti suciali, è à veda ni l’ultimi elementi ch’indittani a pessima situazioni di a squadra, u Cullittivu Biancu è Rossu hà riagitu è hà purtatu issi novi infurmazioni à i sustinidori.

« Di pettu à issa squadra chì pianu pianu si sprufonda, cù a ritrugradazioni in Naziunali 1 prununciata da a DNCG, è di pettu à a incapacità di l’attuali dirizzioni à guaranzì a vita di l’AC Aiacciu, u cullittivu Biancu è Rossu dumanda a dimissioni subitu di u dirittori ginirali è di u dirittori finanzieri di a squadra. Cacciati issi dui parsoni, dumandemu di manera rispunsevuli un cambiamentu prufundu di guvirnanza, ch’idda sichi à liveddu spurtivu o à liveddu amministrativu, cù a partenza d’ugni parsona avendu cuntribuitu à a travviera attuali. 

Dipoi uni pochi di staghjoni, a gistioni attuali, chì manca di chjarura, d’antivista è di cuarenza strategica, hè sbuccata à nantu à una dramatica trappula senza isciuta.
Ùn hè più tempu pà i mezi misuri è i neci. Hè tempu d’assuma i rispunsabilità d’issa pessima situazioni chì tocca a noscia squadra.

A dimu oghji cù gravità è ditarminazioni : u mantinimentu d’issi dirigenti à i so posti hè un ustaculu pà qual’sia si a prova di ridrizzamentu, ripresa o ricustruzzioni.
In li ghjorna à vena, emu da sullicità i sucio prufiziunali è i imprisarii ingagiati, pronti à impignà si di manera cuncreta in una dinamica nova.

Qual’ch’iddi sichini i dicisioni à vena pà u liveddu ind’iddu ghjucarà l’ACA, a noscia vulintà hè sempri quidda : salvà ciò chì si pò, è appruntà una ripresa sana è duratoghja, arrimbata à i valori storichi di a squadra.

In u stessu tempu, da associu urganizatu è lighjittimu di sustinidori, u Cullittivu hà da essa attenti bè à u duvintà di l’associu ACA, cù u fini di mantena ni l’idintità, a storia è i radichi pupulari, dendu un quadru strutturativu à chì vurria impignà si pà u so avvena.

Chjamemu i sustinidori, socios, anziani ghjucadori, aducatori è innamurati di a squadra à mubilizà si par scriva insemi una pagina nova di a storia di l’AC Aiacciu.
Ricusemu di calà u capu. A noscia fedi sarà sempr’ardenti è nimu ùn la pudarà smattà. CULLITTIVU BIANCU È ROSSU »