À la découverte du Purtichju Fest’Arti
A municipalità di Grussetu, a Prugna è Purtichju è a mediateca municipali urganizighjani a quinta edizioni di Purtichju Fest’Arti, vennari u cinqui è sabbatu u sei di ghjunghju, à u centru culturali di Purtichju.
Issu ritrovu culturali t’hà par fini di metta in valori i pratichi artistichi qual’ch’iddi sichini.
Cusì, a mediateca dà cunfirma di a so vulintà di fà campà a cultura in cori à u tarritoriu.
Pà issa nova edizioni, u fistivali si hà da arrimbà à una timatica federatrici : i lettari, visti da arnesi di criazioni, di sprissioni è di trasmissioni.
Da avvià u fistivali, una ghjurnata hè didicata à i sculari.
Vennari u cinqui di ghjunghju, parichji classi ani da participà à attelli di scuparta di a fabricazioni d’inchjostri, di tinti è di pitturi naturali. Sabbatu u sei di ghjunghju, da deci ori à cinqui ori di sera, ci ani da essa attelli gratisi è animazioni, sempri liati à issa timatica di i lettari.
U publicu hà da pudè scopra a fabricazioni di pinneddi, calami, mini naturali, è ci sarani ancu attelli di calligraffia sgiappunesa, di musaichi, di mudillatura, di tattuasgi effimari, di cusgitura. Hè ancu privistu un cuncursu di criazioni di u novu logò di a mediateca.
Par ciò chì tocca à a musica, u fistivali hà da riceva, à parta si da sei ori di sera, à Batuk’Aja, una furmazioni di pircussioni brisiliani. À chjuda u fistivali hà da essa u gruppu Las Tetas, è hà da essa uffertu un appiritivu à u publicu.
Par rinsignà vi, chjameti u 04 95 25 06 55
Sur le même sujet
