14 juillet 1755 : Pasquale Paoli était proclamé général en chef de la nation corse
In u 1755, trà u 14 è u 15 di luddu, Pasquali Paoli era fattu capu ginirali di a Nazioni Corsa.
Esiliatu cù u babbu Ghjacintu dipoi a fini llu regnu di u Rè Tiadoru, hè statu chjamatu da i rivuluziunarii corsi, bramosi di truvà si un capimachja da scaccià i ghjinuvesi.
In a cunsulta llu cunventu di Sant’Antonu di a Casabianca, ind’idd’erani riprisintati 16 di i 40 pievi isulani, hè statu elettu Pasquali Paoli pà u so giniralatu di 14 anni.
Da tandu, funi attaccati i gran’prughjetti : scrittura d’una custituzioni, criazioni d’un’armata, d’una marina, d’una muneta, d’una stampa naziunali, d’un ghjurnali ufficiali, d’un portu di guerra è d’un’università.
Circhendu à furzà i truppi stranieri à disirtà, à scriva legi, à cundannà à morti o scaccià da Corsica i tradittori, Paoli è i soi avviani una « guerra perpetua à a ripublica di Ghjenuva, è à ugni putenza chì li daria prutizzioni ».
L’opara di Paoli si hè fatta innanzi bè à i pratesi « lumi » francesi. In quantu à l’amiricani, chì si sariani rivindicati di a so lascita, ramintemu chì a so indipindenza ùn hè chè quidda di i culoni, è chì i corsi, s’iddu si faci issu paragonu chivi, ùn sariani chè l’indiani di a storia.