Bastia : retour sur le rassemblement de Paese Novu, dans le calme, au mot d'ordre Racailles Fora

Sabbatu, à senta ni i forzi di l’ordini, circa 600 parsoni si sò accolti in Paese No’, in Bastia, rispundindu à a chjama « Racailles Fora, Basta cusì ! ».

Iss’accolta hè stata urganizata in risposta à l’aggrissioni chì Raphaël, un ghjovanu di 18 anni, ni saria a vittima. L’affari saria successu à nantu à u staziunamentu d’un centru cumirciali, in Furiani, di notti, trà u 4 è u 5 di ghjinnaghju.

Dipoi, a inchiesta hè sbuccata à nantu à quattru missi in asaminu : quiddi di trè ghjovani à mutivu di viulenzi vulintarii in riunioni avendu purtatu à una intarruzzioni di u travaddu di menu di ottu ghjorna, ma ancu quidda di Raphaël, à mutivu di viulenzi vulintarii incù arma è portu d’arma di catiguria D.

Ani da essa ghjudicati, tutti, u 12 di frivaghju in Bastia, in tribunali currizziunali.

L’accolta ùn n’avia urganisatori ufficiali, ma l’associu Palatinu ci hà presu una bedda parti, arrichendu bandiretti è sunurisazioni.

Issu matiriali hè ghjuvatu à Guillaume, u frateddu di Raphaël, chì hà presu a parolla. Ricusendu di parlà di baruffa pà l’incidenti di Furiani, hà vulsutu pricisà u cuntestu d’issi fatti.

Iss’aggrissioni saria nata calchì mesi fà, parvia di l’uppusizioni di u so frateddu à l’andamenti disturbatori è pochi rispittosi d’una banda di ghjovani in un sinemà bastiacciu. È innanzi à a passata di u staziunamentu, Raphaël saria statu trasinatu da issa banda daretu à un fast food di Montesoru.

Ùn vulendu indittà troppu nè u quartieri di Paese No’, nè un’etnia, nè una rilighjoni qual’ch’idda sichi, hà dittu a so brama d’ùn veda un’altra famidda patà si cosi cumpagni.

Steti à senta à Guillaume.

Nicolas Battini, u capifila di l’associu Palatinu, ùn si vargugna d’essa vicinu à a strema dritta. Beddu sciaccamanatu da l’aienti dopu à a so presa di parolla, si hè impinsiritu chì a Corsica ùn duventi com’è issi pirifirii, com’è a Seine Saint Denis.

Si n’hè presu ancu à u lascia corra di i cumpunenti di u naziunalismu corsu, è più pricisamenti à Femu a Corsica, ch’iddu si lasciò à a fini di u 2022.

A municipalità bastiaccia hè stata criticata ancu idda, è Nicolas Battini ùn piatta tantu a so vulintà di fà a battaglia di i municipali di u 2026, nè a so vulintà di dà nascita à un partitu puliticu indiatu in u filu di a dimarchja di Palatinu.

Steti lu à senta.

Ùn era solu Palatinu à riprisintà a strema dritta.

A sizzioni bastiaccia di Reconquête avia rispostu à a chjama, ed era prisenti via u so riprisintenti Jean-Michel Lamberti. Erani prisenti l’anzianu candidatu RN à i lighjislativi, Alexis Fernandez, o ancu Filippo de Carlo è Jean-Antoine Giacomoni.

Uni pochi di militanti naziunalisti erani chivi à titulu individuali, cù uni pochi d’anziani gilecchi giaddi o altri militanti anti vaccini. Julien Morganti, chì c’era ancu iddu, ùn hà vulsutu spiicà a so dimarchja à a stampa.

Jean-Michel Lamberti, à nomu di Reconquête, hà dittu ch’iddu ùn avia tantu vodda di veda a Corsica piddà a via di ciò ch’iddu si vidi pà issi cità di u cuntinenti.

Steti lu à senta.