Femu a Corsica a tenu son assemblée générale constitutive
(A redazzioni d'Alta Frequenza) - Parechji centunai di parsoni si sò aduniti in un anfiteatru Adolphe Landry di Corti colmu pà l'assemblea generali custitutiva di Femu a Corsica. Femu a Corsica franca cusì un passu inde a so esistenza, divintendu d'una manera ufficiali un partitu puliticu. Un'AG chì s'assumigliava à un meeting, induva Jean Biancucci pà A Chjama, Ghjuvan Cristofanu Angelini pà u PNC è Gilles Simeoni pà Inseme sò ghjunti à a tribuna pà metta in avanti i ligni direttivi di ssu novu partitu chì adunisci i trè di prima. Tuttu què davanti un publicu induva si pudia ritruvà calchi elementu raprisintativi di l'aparturadi u partitu à parsoni ghjunti d'altri currenti pulitichi, certi à u prima rangu com'è l'aghjuntu à u merri di Furiani è vici presidenti di a CAB, Louis Pozzo di Borgo, o più in ritiru inde l'assistenza, com'è u merri di San Larenzu è anzianu candidatu à i tarrituriali di u 2015 nant'à a lista Prima a Corsica, Jérôme Negroni. Un'apartura chì si faci è si farà senza scurdassi di i fundamenti di a lotta naziunalista, eccu ciò ch'elli ani prumissu i capimachja di l'urganisazioni nova, sempri aparta à u dibattitu cù tutti l'altri cumpunenti di u naziunalisimu, da i so partinarii primi di Corsica Libera fin'è i cuntistatarii di u Rinnovu. Femu a Corsica t'hà u scopu di trasfurmà da quì à u 2027 i vittorii eletturali in vittoria pulitica vera.
Steti à senta à Ghjuvan Cristofanu Angelini.
