Corse dans la Constitution et proposition d'article spécifique à l'Assemblée de Corse : Jean-Martin Mondoloni n'a pas transigé
(A redazzioni d'Alta Frequenza) - 48 voti nant'à 63 ! Eccu u risultatu di u votu intarvinutu ssu ghjovi appena nanzi à mezanotti inghjiru à u prughjettu d'articulu specificu à a Corsica da inseriscia inde a Custituzioni. I gruppi Femu a Corsica, Corsica Libera, ma dinò Andà per Dumane di Jean Charles Orsucci ani vutatu à prò, com'è Petru Ghionga, chì ùn hà micca suvitatu u gruppu di Valérie Bozzi. Ss'ultimu gruppu, La Corse dans la République, hà vutatu, senza surpresa, contru, com'è l'altra furmazioni di diritta, Per l'Avvene, purtata da Jean Martin Mondoloni. Una pruposta d'articulu di l'Esecutivu di Corsica è di a maghjurità tarrituriali cù, bè prisenti, a nuzioni d'autunumia è a dumanda d'abilitazioni pirmanenti inde parechji duminii, cù quantunqua dui uzzioni inde dui sizzioni di a so redazzioni, una di a maghjurità tarrituriali è l'altra d'Andà per Dumane. Fideli di pettu à u so discorsu di a vigilia in cunfarenza di stampa, u gruppu Per l'Avvene hà dunqua vutatu contr'à ssu testu. Ùn hè micca un scoop, ùn ci l'hà fatta à truvà un accordu cù a maghjurità tarrituriali, mentri chì a so pruposta inghjiru à un articulu 72-5 senza fà rifarenza à l'autunumia hè stata righjittata da u restu di l'Assemblea. Jean Martin Mondoloni dici ch'ellu hè pocu cunvintu oghji di pettu à u fattu chì Parighji accittessi u nivellu d'esigenza di l'eletti corsi inghjiru à st'articulu custituziunali.
Steti à senta à Jean Martin Mondoloni.
