Cité des Monts à Bastia : la parole des habitants
(A Ridazzioni d'Alta Frequenza) - Innò à a distruzzioni, iè à u rinovu. Eccu u missaghju di l’abitatnti lli bastimenti 32 è 33 di « La Cité des Monts », in Bastia, chì ani fattu una pitizioni. A distruzzioni d’issi bastimenta, li manca pocu da essa ratificata da a cità di Bastia, in lu quadru llu rinovu urbanu di u quartieri. L’abitatnti chì ani fattu a pitizioni – riprisentani trè famiddi à nantu à quattru – sò sustinuti da u Mouvement Corse Démocrate, di François Tatti. Ci hè statu d’altrondi un puntu di stampa in cumunu, da cuntistà u prughjettu lla maiurità municipali bastiaccia. Par François Tatti, ùn ci hè bisognu à lampà issi bastimenta, ch’ùn portani piriculu. Ci vurria piuttostu à rinuvà li à veru. Ni prufitta par fà rimarcà chì, par iddu, a maiurità municipali ùn sà nudda di quiddi chì sò à pighjò in iss’alloghja. Certi sò chivi chì sò cinquant’anni, è ani rimissu in istatu i so appartamenti cù i so proprii soldi.Pà issi cartulari chivi, cunveni sempri à stà à senta ciò ch’iddi dicini l’abitanti. Julie, pighjunanti chì sò cinquant’anni à u sestu pianu llu bastimentu 33, è Houria, pighjunanti ancu idda in stu bastimentu, ci dani u so parè. À julie, chì hà passatu a maior’parti lla so vita in st’appartamentu, ùn li cunveni ch’iddu sichi lampatu. Houria, inveci, ùn s’upponi micca à a so distruzzioni, è metti à palesu a malsanità llu bastimentu. Eppuri, par casu ch’idda si ritenga l’idea d’un rinovu, vurria ch’iddi cumencini à u più prestu issi travadda. Si dici d’altrondi dillusa da l’azzioni di l’eletti, ch’iddi sichini lla maiurità o di l’uppusizioni.
Stemu à senta issi dui abitanti
Sur le même sujet
