Visite du Président de la République en Corse : incertitudes autour du programme
(A redazzioni d'Alta Frequenza) - Dui ghjorni nanzi à u viaghju in Corsica di u Presidenti di a Republica, Emmanuel Macron, u prugramma ùn hè ancu statu ufficializatu. C'hè un affari sicuru inveci : l'umaghju à u prifettu Erignac sarà urganizatu marti in fin di matinata in Aiacciu, cù a prisenza pussibuli, sicondu BFM TV, di Jean Pierre Chevènement, ministru di l'Internu di farraghju di u 1998. Un intrattenu privatu saria privistu dinò appena dopu in casa cumuna d'Aiacciu trà Emmanuel Macron è u merri di a cità, Laurent Marcangeli. Inveci, u scontru trà u Presidenti di a Republica è i presidenti Simeoni è Talamoni ùn era ancu statu ufficializatu ssa dumenica in principiu di sirata, d'appressu à u presidenti di l'Assemblea di Corsica. Da rimarcà chì Emmanuel Macron, sempri d'appressu à BFM TV, avaria dumandatu ch'ella ci sia una bandera francesi in u locu di l'appuntamentu. Da un'antra banda, a tappa di u Presidenti di a Republica in Bunifaziu ùn saria più privista, dopu u votu vennari à sera da Jean Charles Orsucci è u so gruppu LREM à l'Assemblea di Corsica d'una risuluzioni prisintata da a maghjurità tarrituriali pà lampà una chjama à Emmanuel Macron. Seguita di u viaghju prisidinziali marcuri in Corsica Suprana, cù frà altru un discorsu induv'ellu si trattaria infini di pulitica. Dopu u successu di a manifistazioni pupulari maiò di sabbatu in Aiacciu, i Corsi aspettani u Presidenti di a Republica, dumandenduli solu di rispittà a demucrazia.
Sur le même sujet
