Vigilance orange pluie-inondations en Corse : très fortes précipitations attendues, des établissements scolaires fermés ce mercredi
À parta si da marti à 10 ori di sera, è sinu à marcuri à 6 ori di sera, a Corsica sarà missa in vighjulanza arancina, parvia llu risicu d’acquati è pieni.
Di notti, trà marti è marcuri, i scurruttoni ghjunti da u mari tirreniu tuccarani l’isula à Meziornu è à Liventi. Tocca a mità di a notti, pudariani falà sinu à 30 millimitra à l’ora. Dopu à una calma in fin’ di notti, ci pudaria essa una siconda passata di scurruttoni, marcuri in cor’di matinata.
Iss’acquati duvariani ghjunghja à liventi sinu à a fini llu dopu meziornu, è tuccà ancu un pocu u Punenti, in i so parti alti. Cù issa passata, pudariani falà da 20 à 30 millimitra à l’ora. I circondi di a Sulinzara, Corti, Ghisoni, Cervioni è a piaghja à Liventi duvariani essa tocchi bè.
Duvaria piova menu à Punenti è à u Nordu di l’isula.
Glubalmenti, cù iss’acquati, pudariani falà da 100 à 150 millimitra in muntagna à Liventi, è sinu à 80 millimitra in piaghja. I licea è culleghja di Cervioni, Corti, è di u Fium’Orbu sarani chjusi marcuri, u 10 di nuvembri.
I trasporti in cumunu pà i circonda di Cervioni, di a piaghja à Liventi è di u Curtinesu sarani suspesi pà a ghjurnata di marcuri.
Parvia di u risicu, u prifettu dumanda à i pupulazioni lli circonda d’Aleria, Corti è a Sulinzara di limità, quant’iddu si pò, i dispiazzamenta.
Sur le même sujet
