Vents forts : appel à la vigilance et à la prudence pour la fin de semaine en Haute-Corse
(A redazzioni d'Alta Frequenza) - I servizii di Météo France privedini da dumani à sera (ghjovi) fin'è sabbatu da mani una vintata forti da punenti à meziornu punenti soprattuttu in Balagna, in Capicorsu è in muntagna, cù buffulati à 80 chilometri à l'ora. I risichi di fochi, nant'à issi lochi quì, ani da essa assai alti dunqua. Di pettu à u risicu "focu di furesta", a circulazioni di i parsoni, u staziunamentu è a circulazioni di i veiculi sò pruibiti, duranti tuttu u periudu, nant'à i pisti è vii micca adattati di i monti è furesti di : Bunifatu, Fangu, Manganellu, Verghjellu, è nant'à quilli di u tarritoriu di l'Agriate. Tutti i servizii chì travaghjani ind'a privenzioni è a lotta contr'à i fochi sarani assai mubilizati in issu mentri, i mezi è parsunali sari pronti è impustati nant'à i lochi i più sinsibuli. Da nutà chì di pettu à issu cambiamentu di tempu, l'attività d'acqua è più particularmenti andà à u mari sò un periculu di pettu à i marosuli maiò. A dumenicata scorsa, i salvatori sò stati ubligati à intarvena pà purtà succorsu à parsoni micca prudenti. Ci voli à incalcà dunqua nant'à i misuri di prudenza di basa, u mari pò raprisintà un periculu. Infini, di pettu à iss'elementi quì, a prifettura rammenta chì l'intardizzioni di qualsiasi usu di u focu fora devi essa rispittata di modu pienu fin'è u 30 di sittembri, azzioni in ghjustizia pudendu essa rializati ind'u casu cuntrariu.
Sur le même sujet
