Vente d'un terrain agricole à Olivese : la mairie saisit la SAFER
A spiculazioni tocca ancu a campagna.
Hè u merri di Livesi chì s’impinsirisci di issa situazioni à nantu à u tarritoriu lla so cumuna.
Eccu ciò ch’iddu dici : « In Livesi, un pezzu di tarra di quattru ettari non custruttibili, in Pisali, si vendi pà 100 000 auri, cù l’aiutu d’agenzi immubiliari ».
U merri hà dumandatu ch’idda sichi ritirata issa vendita à prezzu sprupusitatu, è n’hà chjamatu à a SAFER.
« Hè pussibuli di ritruvà un pocu di ghjudiziu è metta un prezzu cuirenti pà un tarrenu agriculu », hà dittu u merri.
Hà pricisatu ch’iddu avia da sullicità à issu sughjettu u prisidenti llu cunsigliu esecutivu è i gruppi pulitichi di l’assemblea di Corsica.
