Vente à perte des carburants en Corse : infaisable selon les distributeurs, inadapté selon les consommateurs
Élisabeth Borne, a prima ministra francesa, hà dittu issa duminicata ch’idda saria fatta prestu a pruposta d’una legi chì pirmittaria di venda à perdita i carburanti.
A misura hè bedda cuntrastata pà issi franci, è i distributori altirnativi ch’idda tocca in prima – l’iper è i supermarcati – ùn la farani viaghjà.
In Corsica, ùn issendu ci ni distribuzioni in fora di i stazioni tradiziunali, issa misura ùn pudarà essa missa in anda. Hè ciò ch’iddu pensa u sindicatu di i distributori di carburanti llu Cismonti.
Cù 86 % di pumpisti indipindenti, u sindicatu dici chì a situazioni hè bedda difficuli pà i stazioni isulani, è a limita di 1,99€ à litru imposta da Total ùn arranghja nudda. Issa marca, à senta ni u sindicatu, ublica l’altri stazioni è i so gruppi à fà sforzi difficiuli à tena à longu andà.
Pà Serge Antoniotti, ci vurria una rigulazioni di i prezza, com’è in certi tarritoria oltrimarini. Hè quissa una vera suluzioni, è ni pudariani prufittà pumpisti è cunsumatori à tempu. Steti lu à senta.
U cullittivu « Agissons Contre la Cherté des Carburants en Corse » si ni pidda à a dimagugia è à l’inadattazioni d’issa misura guvirnamintali. À senta lu, u statu devi intarvena à nantu à i tassi par fà calà i prezza, inveci di finanzà a vendita à perdita.
Glubalmenti, ùn cambia mancu stampà u pinsà di u cullittivu : spieca chì a cunfigurazioni di l’azziunariatu di i dipositi pitrulieri di Corsica rendi a cuncurrenza difficiuli, o ancu impussibuli, mentri chì l’azziunarii di i sucità accatamansighjani binifizia à liveddu mundiali.
Ed hè mintuvata dinò, da u cullittivu, a suluzioni lla rigulazioni.
Par avali, à com’iddi sò i cosi, u carburanti hè troppu caru chì sò aghjà parichji mesa, dici Frédéric Poletti, à nomu di u cullittivu.
Sur le même sujet
