Une vidéo crée la polémique sur les réseaux sociaux
Photo facebook
In mità di dopu meziornu, hè stata spartuta tant’è più una videò pà issi reti suciali.
Ci si vidini è sentini CRS chì cantani « La Marseillaise », in a so caserna di Furiani.
In certi d’issi publicazioni, hè dittu chì l’affari saria successu mentri u intarramentu d’Yvan Colonna.
Ma ùn hè cusì asatta d’autintificà lu, issu ducumentu, nè di cunfirmà ni l’ora o u ghjornu.
Ma sichi ciò ch’idda sichi, i pulitichi ani presu a parolla.
Via Twitter, hà dittu « Femu a Corsica » chì « i CRS di Furiani ani fattu una festa maiori arimani, da fistighjà u intarru d’Yvan Colonna : brasgeri, Marseillaise cantata à voci rivolta attempu attaccatu l’intarru, brioni di gioia à son’ di « on l’a eu »… Eccu una prova di l’odiu culuniali » , dici « Femu a Corsica ».
Pà u PNC, « à l’ora chì a Corsica facia onori à a mimoria d’Yvan Colonna, è ch’idda viaghjaia à fiancu à i soi mentri l’intarru, ci sariani stati sceni di gioia in a caserna lli CRS di Furiani. Issi brioni d’alligria par no’ sò à veru unu scandalu. U guvernu si devi spiicà. U PNC, com’è tanti altri i corsi, aspetta spiicazioni, senza ambiguità micca, è senza tricà ».
Corsica Libara dici chì « dopu à avè fattu veda i so capacità riprissivi, chì ani accatizzatu u focu d’una ghjusta collara, i forzi ditti di l’ordini ani musciatu arimani ciò ch’iddi sò à veru. Mentri l’intarru è l’umaghju naziunali resu à Yvan Colonna, i CRS lla caserna di Furiani ani fattu una infami pruvucazioni. I forzi di riprissioni si ni devini andà, senza altru ».
U gruppu « Fà Populu Insemi » di l’assemblea hà dittu chì « à u mumentu pricisu ch’iddu cuminciaia l’intarru d’Yvan Colonna, i CRS di Furiani ani attaccatu à cantà a Marseillaise, finindu cù brioni di gioia. A pulizza francesa si rallegra ch’iddu sichi statu assassinatu da un gihadistu, Yvan Colonna. U guvernu devi renda contu, è subitu, d’issu scandalu ».