Une coupe du monde très ajaccienne
(A redazzioni d'Alta Frequenza) - L’Aiaccini sò assai fieri di u cumpurtamentu di certi ghjucadori à a cuppa di u mondu. Ancu s’ellu ùn hà micca ghjucatu i trè primi partiti, Rémi Cabella faci bè parti di u gruppu Francia, è cuntinueghja cusì l’avventura cù i so cumpagni à u Brasili. Quillu chì hà purtatu i culori di l’ACA è di u GFCA campa forsa quì a più grandi sparienza di a so carriera. Scuntrarà u Nigeria in ottesimi. In più di què, dui altri ghjucadori di l’AC Aiacciu sò riisciuti, cù a so selezzioni rispittiva, à qualficassi anch’elli pà l’ottesimi di finali. U primu, u più mediaticu, hè Memo Ochoa, u guardianu tremendu di u Messicu. S’è certi ani da cunsidarà ch’ellu ùn sarà più aiaccinu a staghjoni chì veni, u so cuntrattu cù Aiacciu cumpiendu si in fatti da quì à calchì ghjornu, hè bè u ghjucadori aiaccinu chì hè statu selezziunatu cù u Messicu, dopu à una staghjoni parsunali riisciuta. Memo Ochoa ghjucarà contr’à l’Ollanda in ottesimi di finali. Un antru ghjucadori aiaccinu sarà prisenti à u prossimu ghjiru. Hè Mehdi Mostefa, l’internaziunali algerianu. U mezu di tarrenu scuntrarà, cù a so selezzioni, l’Alimagna in ottesimi. Mehdi Mostefa hè liatu à l’ACA fin’è u 2015. S’è no cuntemi dinò à Carl Medjani, qualificatu dinò ellu cù l’Algeria, sò quattru ghjucadori in tuttu, o anziani ghjucadori chì sò passati pà Aiacciu è chì sò qualificati pà a seguita di a cumpetizioni. Faci piacè !
