Un nouveau magasin la Foir'Fouille incendié à Mezavia
(A redazzioni d'Alta Frequenza) - Dopu à u focu di u magazenu la Foir'Fouille ind'a nuttata di ghjovi à vennari in Biguglia, è chì hà distruttu tutalmenti i lochi, un antru magazenu di a stessa marca hè statu calcinatu di modu sanu da i fiammi stanotti (vennari à sabbatu), in Mezavia. Più di 1500 m2 sò stati brusgiati, è a faccia à livanti di u magazenu s'hè affundata. Sopralocu, più di una quarantina di spinghjifochi hè stata mubilizata da ammaistrà u sinistru. I casi vicini sò stati sbiutati, par raghjoni di securità. Un perimetru specificu hè statu missu in ballu à lestra da rializà i primi investigazioni. Iss'ultimi cuntinueghjani stamani. Sicondi i primi elementi racolti, buttighji di gaz sariani stati ritrovi à u nivellu di u magazenu ; iss'ultimi avariani splusatu d'altrondi. L'inchiesta hè stata cunfidata à a pulizza ghjudiziaria.
