Le Direct

Très nombreuses réactions de soutien à Pierre Alessandri

(A ridazzioni d'Alta Frequenza) - 

Dopu à u focu chì hà arruvinatu a distillaria di Pierre Alessandri, sò stati numarosi i riazzioni di sustegnu in Corsica. Riprisintenti di partiti pulitichi, di sindicata, associ è ghjenti d’ugni urisonti ani fattu senta a so sulidarità cù l’agricultori, capifila di u sindicatu Via Campagnola.
Si nutarà trà quissi :

Gilles Simeoni, u Prisidenti di l’Esecutivu, via Twitter : « incendiu criminali di l’ardignu di travaddu di Petru Alessandri, rispunsevuli sindicali di Via Campagnola è militanti naziunalistu da i tempi lla nostra ghjuvantù. Malfatta vargugnosa è indegna. Sustegnu fraternu à Petru è à a so famidda ».

Sustegnu dinò di Jean-Guy Talamoni, u Prisidenti di l’Assemblea : « Sustegnu à Petru Alessandri, rispunsevuli sindicali, culpitu da un attintatu contru à a so intrapresa agricula ».

I diputati corsi ani fattu, ancu iddi, senta a so sulidarità, è ani cundannatu l’affari di manera chjara è ferma.

Jean Charles Orsucci, merri di Bonifaziu è Prisidenti di u gruppu « Andà par dumani » à l’Assemblea di Corsica, hà cundannatu « un attu ch’ùn si pò accittà nè ghjustificà».

Jean Martin Mondoloni, à nomu di u gruppu Par l’avvena, hà dittu «nudda ùn ghjustifichighja a distruzzioni di u travaddu d’un omu, masimu quand’iddu sfrutta a so tarra ».

Valérie Bozzi, pà u gruppu « La Corse dans la république » dici ch’idda si pò « rigrità à veru ch’iddi si vichini, iss’ultimi anni in Corsica, distruzzioni d’arnesi di travaddu d’omi è donni, chì sò u stentu d’una vita »

Cori in Fronti infini « porta u so sustegnu fraternu à Petru Alessandri, agricultori è militanti di Via Campagnola, pà u quali u locu di travaddu hè statu toccu da u focu sta notti à U Mandriolu in Sarrula Carcupinu. Sti pratichi maffiosi devini piantà. L'agricultura corsa camparà ».

Visuel Via Campagnola