Territoriales : Jean-Charles Orsucci a présenté sa liste Andà per Dumane
(A redazzioni d'Alta Frequenza) - « Andà per dumane » ! Hè u slogan sceltu da a lista purtata da Jean Charles Orsucci è investita da u partitu di u Presidenti Macron, La République en Marche pà i tarrituriali. À mezu à i 62 nomi aduniti inghjiru à u merri di Bunifaziu, ci sò parechji parsunalità di u mondu puliticu o di a sucità civili isulana, com’è Catherine Riera, numaru 2 è presidenti di l’associu La Marie Do, u presidenti di u Cunsighju Dipartimintali di Corsica Suprana, François Orlandi, à u terzu postu, u cap’intrapresa è presidenti di u club prufiziunali di ballò di Tours, Jean Marc Ettori, 7esimu, o ancu l’anzianu elettu aiaccinu, François Casasoprana, 15esimu. Una lista chì, s’ella accogli parechji omi è donni di manca, hè difinita com’è diversificata è cuerenti di pettu à i dumandi d’En Marche da Jean Charles Orsucci, cù un corpu ideulogicu chì và « da u Front de Gauche fin’è i listi di diritta ». Un prugramma chì metti largamenti in avanti l’ecunumia, ma dinò u principiu d’autunumia di a Corsica nentru a Republica grazia à u pattu girondinu. Pà u leader d’Andà per Dumane, ùn si trattarà mancu appena di discorra cù a maghjurità naziunalista attuali è di gistiscia cun ella. Inveci, Jean Charles Orsucci accerta ch’elli ci sarani discussioni da quì à calchì ghjornu cù altri partinarii chì si pudariani ritruvà inghjiru à una piattaforma cumuna pà un sicondu ghjiru.
Steti à senta à Jean Charles Orsucci.
