Telefilmu Mission Sacrée : Avà basta !
(Alta Frequenza) - Fin’induva si pò andà ind’a caricatura, è soprattuttu ind’a stimmatisazioni di un’isula, d’un populu è di a so ghjenti ? Sò i dumandi ch’ellu ci voli à pona si dopu à i diffusioni arisera, di u telefilmu, Mission Sacrée, nant’à France 3. Torna una volta, forsa quilla di u troppu, un’opara cinematograffica, s’è no pudemi chjamà què un’opara, hà furzatu u trattu, fendu passà i corsi pà mezi tonti, sgaiuffi, assistuti, o ancu misogini. Una lista chì pudaria essa più longa, quand’ellu si vedi chì i nostri eletti, o i funziunarii di a funzioni publica sò stati discritti. I naziunalisti elli, sò di una bistialità tremenda, gattivi è rozi. Un’affari chì farà piacè à i 36 % di i corsi ad’avè purtatu u so votu nant’à issa sinsibulità pulitica pà l’ultimi tarrituriali. Issu telefimu di Daniel Vigne ùn mancarà micca di fà sorghja a scuntentezza in Corsica, parchì innò, i corsi ùn sò micca « Shadocks à suchjà sunvenzioni », innò i zitelli corsi « ùn ghjocani micca cù l’armi di u so babbu, u marcuri dopu meziornu », innò l’eletti corsi ùn sò micca tutti manipulatori o mezi tonti, com’ellu hè statu u casu pà a discrizzioni di u merri d’Aiacciu. Eccu com’è i raprisintazioni esagerati poni renda un filmu ridiculu.
Sur le même sujet
