Tags visant Laurent Marcangeli : les réactions
Via i reti suciali, sò stati parichji i sustegni à Laurent Marcangeli, ch’hè statu insignatu à nantu à calchì muru scrittu, dopu à a manifistazioni di duminica.
U gruppu Fà Populu Insemi di l’assemblea hà dittu « ch’iddi si poni avè avvisi cuntrarii in pulitica, ma ch’idd’ùn si pò accittà di minaccià o inghjurià un elettu. Tuttu u nosciu sustegnu à Laurent Marcangeli, toccu da issi scritti. Ùn hè micca a Corsica chì no’ vulemu », hà dittu u gruppu maiuritariu di l’assemblea.
Gilles Simeoni hà datu ancu iddu « u so sustegnu à Laurent Marcangeli, dopu à l’inghjurii scritti chì l’ani toccu, è ch’ùn si poni ghjustificà. A Corsica chì no’ vulemu, hè quidda di u rispettu, quiddu di l’aienti è quiddu di a dimucrazia ».
Jean-Christophe Angelini manda u so « pienu sustegnu à Laurent Marcangeli toccu da inghjurii scritti ch’ùn si poni accittà. A dicu di manera sullenna : atti cumpagni, ùn si ni pò ghjustificà. Sustegnu è abbracci ».
U PNC, chì dinuncia i viulenzi lli forzi di l’ordini contru à i ghjovani è a pupulazioni, dici chì « i scritti chì ani toccu à Laurent Marcangeli, u merri d’Aiacciu, ùn si poni ghjustificà : dicini una visioni lla pulitica è di i raporti suciali chì ùn viaghja cù i nosci usi culturali. A causa d’un Populu, chì hè a noscia via è u nosciu drittu, devi firma digna è rispittosa ».
Infini, u gruppu « Un soffiu novu » pricisa in un cumunicatu ch’iddu ùn hà da participà à i riunioni urganizati da l’agenzi, uffizii è altri urganismi lla Cullittività, sin’tantu chì i voci d’un appacià ùn si sarani intesi di manera chjara ».
Ramintemu quantunca chì, dopu à a manifistazioni di duminica, parichji parsoni sò stati ferti da i tiri di i forzi ditti di l’ordini, è chì una donna hè stata stroppia bè à una ghjamba.
Sur le même sujet
