SYVADEC et maires de la côte ouest souhaitent la reprise immédiate de l’exploitation de Vico
(A redazzioni d'Alta Frequenza) - Dopu un primu scontru cù u Statu è l'esecutivu tarrituriali u vennari l'8 di ghjinnaghju, l'eletti di u scagnu di u SYVADEC ani scuntratu ssu ghjornu i merri di i 33 cumuni di u cantonu di u punenti corsu pà studià a prublematica di l'avvena di u situ di Vicu di pettu à a situazioni glubali di u trattamentu di rumenzuli è à i dumandi di u cullittivu "pà un Pumonte pulitu". Dopu avè analizatu i dati tennichi è finanziari, è di pettu à l'urghjenza sanitaria, ani presu ssi pusizioni quì : scartani l'idea di una sfruttera riservata à i 33 cumuni di u cantonu par via di i costi troppu alti chì sariani inghjinnati pà l'amministrati di u tarritoriu è in cunfurmità cù i principii di sulidarità pulitica è finanziaria chì gistiscini u sindicatu è chì sò scritti in u PPGDND. Volini a ripresa subbitu di a sfruttera di u situ in i cundizioni privisti da l'arrestatu di sfruttera è in cunfurmità cù l'esigenzi di gistioni in raghjoni di i rumenzuli di l'isula, ancu pà u trattamentu di i rumenzuli in suffrenza. Accettani di pinsà à una prulungazioni di a suspensioni di i travaghji di a 2nda cantara in u quadru di u muratoriu prupostu da l'esecutivu tarrituriali senza preghjudicà dii mudalità di spartizioni di l'incidenzi finanziari chì sarani assai impurtanti. Ssu tempu parmittarà di dà una visibilità chì pudissi bastà à tutti i parti cuncirnati pà prununziassi di una manera difinitiva annant'à u prublema. Dumandani una riunioni in furia cù l'Esecutivu è u Statu pà cuurdunà i discussioni chì devini intarvena cù l'interlocutori lucali. Da un'antra banda, l'eletti di u Syvadec cuntinuarani a missa in opara di i dimarchji ghjuridichi pà tena l'intaressi di l'aderenti di u sindicatu.
Sur le même sujet
